شام

في إيام بينربط فيها عقلك عن الفهم، بينشف الدمع وبتخرس فرد مرة الكلمات.
كلنا هيك، سبحان الرحمن اللي قدّر ولطف وكرّمنا بقلوب ما بيوقفها عن إرادة الحياة ألم، الحمدلله على نعمه اللي ما بتنعد، الحمدلله اللي جعلنا بلد للآيات والمعجزات، الحمدلله إنه كل كسر عم يقوينا، وكل موت عم يحيينا.
شكرًا يا رب لأنك اخترتنا، لأنك اصطفيتنا، لأنك كرمتنا وعم تصنعنا على عينك نحن كمان.
شكرًا لأنك وهبتنا قلوب بتنبض بالرحمة والدعوات عدد الدقايق والساعات، شكرا لأنّا مؤمنين تمام الإيمان إنه حتى اللي ما بتستوعبه العقول هو لطف ورحمة ومنع ومنح بدون شك، ولا أدنى شك.
شكرًا لأنك بتمهلنا، لأنك واعدنا، لأنّا منحبّك وإنت العالم بدون ما نعبّر وبدون ما نقول.
وشكرًا لأنّنا منعرف إنه هاد الألم اللي كوى الروح كوي بأجره عندك يلي ما بتضيع عنده الأجور.
يا رب، ساعدنا ما ننسى، ساعدنا تتم قلوبنا على بعض متل هالإيام، اجعلنا بعنايتك، امنحنا القوة نكون أهل لكل مين فقد أهله، نبذل وقت لكل مين مو لازمه أكتر من ضمّة وقت، نكون نور وحب وسلام، ونكون لأبد الآبدين: شآم.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *