ياسمين

= صباح الياسمين.
– كيف يعني صباح الياسمين!
= شلون يعني كيف يعني! صباح الياسمين يعني صباح الياسمين.
– مخنوق، ما قادر أتنفس، مدري ما عاد للصبر حيل.
= لا بتقدر، انت اللي بتقدر، إذا ما نحن قدرنا كيف حنقدر نساعد اللي عن جد يساعدوا حالن مو قادرين؟
– قلبي طفي عالخالص، شحن ما في، ما عاد مستوعب صباحات، ما عم نميّز ريحة الموت من ريحة الحياة، الدنيا ضباب، خلص الحكي، ونشفت على كتاف الأمل كلّ الكلمات، وما عادلي روح أتحمّل أكتر من هيك مفاجآت.
= شدة وبتزول.
– مرق العمر وما زال شي.
= ما بيمرق إلا اللي بتمرّق، هاد قرار، بعدين دخلك مين قال إنه العمر كيس مارشملّو بيدوب بغرامك متل ما بتدوب فيه؟
– بالله شو؟ لكان العمر شو، هاتي لنشوف.
= يمكن أعرف أجاوب ويمكن لأ. العمر شغلة عزيزة بدها عزة، قوية بدها قوة. القوة في ناس بتعلمها للناس وناس بتبيعها للّي بيدفع أكتر بيع، ناس بتنقصّها وناس بتزوّدها وناس بتجوهرها، ناس بتنحت الصخر وبتدوّر عليها تدوير، ناس بتشحدها شحادة وناس ما فارق معها تعيش ضعيفة تعيش قوية مادام بطريقة ما الحياة آخدتن على قد عقولن وماشية معن متلما هواهن بيريد.
– قولتك الحياة بتمشي حسب إرادتنا ولا نحن اللي حسب إرادتها ماشيين؟
= …
– …
= بتعرف شو؟
– شو يا ست الشو؟
= العمر شي حلو كتير، كلما بيغص القلب تكة بيتفتح العقل تكتين، كلما بتكبر بتكتشف أدّيشك لقبل آخر كبرة كنت صغير، كل ما بتوعى بتعرف إنه باقيلك قصص وحكايا عم تستناك بالإيام الجاية كتير، كلما بتحط عينك بعين آيات رب العالمين بتحس إنه كلّ آية بدّا منك تعيش حامل مسك موزّع سلام وأحلى من غصن ياسمين، تعيش متطمن، تعيش مو خايف من شي ما دام ألف باء الصبر إنه المحبوس جواته لطف من الرحمن بيسع أكوان العالمين.
– …
= بتعرف شو؟
– …
= طب آخر شو؟
– شو؟
= أنا اشتقتلّي.
– وأنا.. صباح الياسمين.
= جبتلّي مارشملّو؟
– أنا اشتقت للياسمين.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *