ألفين وعشرين

?What’s On Your Mind, Shefaa

حلو كتير .. إنه علاقتنا “خوش بوش”.. والموانة واصلة مواصيلها بيناتنا يا عمّي الأزرق!

بتتفقد أحوالي طول اليوم ..بشو عم أفكر .. شو في بعقلي هلأ .. بتناديني بإسمي .. بتسألني هالسؤال طول الوقت عالرايحة وعالجاي،
بدون ما تكلّ، بدون ما تملّ.

بتعرف إنّه العقل الحرّ دائماً مليان، دائماً عم بيفكر، دائماً عم يركض، دائماً موجوع، دائماً عم يجاهد، ودائماً بده يوصل.

بدي أسألك، إذا بتريد! إيمتى بدّك تصير تسألني عن اللي بقلبي؟ إيمتى حتعمل علاج للمشاكل اللي عم أواجهها من العلاقة العصيّة على الفهم بين هالعقل والقلب؟

طيب.. لح جاوبك .. أنا تعبانة .. تعبانة كتير .. إرتحت هيك؟ بدي أنام بدون ما أفيق كذا مرة باللّيل .. بدي أستمتع باللّقمة بدون ما أغصّ من أخبار النّهار .. بدّي ما أخاف .. بدّي ما أوقع .. بدّي أوصل لفوق فوق فوق .. أنا بدّي أطير.. وبدّي ما أكبر أكتر من هيك.

بدّي أصير الحدا اللي بدي ياه .. بدّي ما أسمع إلا اللي حابّة أسمعه .. بدّي ما أردّ إلا عاللي بيستاهل إنّي أردّ عليه ..

بدّي وبدّي وبدّي.. وعشرتالاف بدّي!! بدّها فوق هالعُمر عُمر! زكاتك عُمر جديد بلا هموم للبيع .. والسعر عالخاص كالعادة!

بدّي أشكر ربّ العالمين اللي خلقني بأحسن تقويم.. بدّي أحمده على نعمه ظاهرها وباطنها.. بدّي أحكي لعيلتي بالبلد.. وبهالعشرطعش بلد المغربين فيها..إني”اشتقتلن”.. إني بكل يوم بحنلّن.. إنه الحنين أصعب شعور مؤلم ومؤذي عرفه الإنسان.. وما عرف يعالجه.. ولا رح يعرف.

إنك تشتاق بدون نهاية.. بدون حلم.. بدون ولا شي..

بدي شغلات كتيرة..بدي تدعو لي.. تدعو لولادي..

بدي ما حدا يتفلسف ويسألني كتير.. ما جاي عبالي حدا الليلة يصححلي حرف.. هيك.. هالمنشور بدي ياه هيك.. “شخبطة روح”.

بدي ما حدا يقلي ليش كتبتي بالسوري.. أنا مشتاقة قبلما أنام أتذكر إني من هنيك..

إذا وقعت عينك عهالمنشور ..بدي أقلك أنه هي أنا .. أنا شفاء .. على سجيتي.. بدون همزات وفواصل وعلامات تنسق النص.. شفاء.. اللي لاقت حالها بالسنة اللي ضاع فيها كتيرين!

معلش تدعيلي.

الله ييسر أمري ويحقق حلمي ويوصلني للشي اللي بدي ياه..

اذا كان فيه خير إلي بدنيتي وآخرتي..

بدي تدعيلي..

ربنا يديم الصحة والعافية والمعافاة الدائمة علينا وعلى حبايبنا ويرزقنا الهنا والرضا والسلام وراحة البال ..

بدي أقلك .. شو في بعقلي .. عن سرّ السلام اللي ما كنت تلاقيه..

بلحظة ما إلها بهالعمر مثيل.. رب العالمين .. المطلع عالسرائر .. حيتمم إرادته ويقول : ُكن .. حيرحم ضعفك وقلة حيلتك .. حيطّلع عليك بعين الرّضا
.. حتلاقي حالك عم تتحول من مجرد حدا عم يجاهد مع الواجبات منشان ما يضيع .. لحدا صار يتسابق مع أهل السنن ويقول يا رب تقبلني معهم لأفوز فوزاً عظيماً ..

اللهم لك الحمد كما يليق بجلال وجهك وعظيم سلطانك

إي نعم.. كانت سنة صعبة كتير .. مُرة كتير كتير.. كلنا منعرف أنه ما حنفيق بعد بكرة وتغمض عيوننا 2021 وتقوللنا سربراااايز! خلصنا هموم.. والحياة حترجع غزل بنات ..

العالم كله عاش حفلة تنكرية هالسنة ..

مرّت سنة.. ما ضمّيت فيها ولاد أختي ولا مرة !

بس الحمد لله، وألف مليون الحمدلله، بكرم من ربّ العالمين ضلّينا عايشين بصحة لليوم ..

شو بدنا أحسن من هيك .. أنه رب العالمين يعطينا فرصة كل صبح نكون نسخة أحسن من أنفسنا ..

مرة تانية بأكد عليكن..

إدعولي ..

إدعولي ولولادي ولعيلتي كتير ..

مع كل الحب اللي رب العالمين رزقني ياه من يوم ما خلقت لليوم .. إلكن جميعاً

دمتم بحفظ الرحمن ..

وتصبحون على ما تحبون وأكثر ..

#شفاء_داود

#منشور_بالعامي

ختام 2020